ਸੁਡਾਨ ਤੋਂ 360 ਭਾਰਤੀ ਦਿੱਲੀ ਏਅਰਲਿਫਟ, ਹੁਣ ਤੱਕ 1100 ਨੂੰ ਬਚਾਇਆ
ਭਾਰਤੀ ਫੌਜ ਸੁਡਾਨ ਤੋਂ 360 ਭਾਰਤੀ ਲੋਕਾਂ ਨੂੰ ਦਿੱਲੀ ਏਅਰਲਿਫਟ ਕਰਨ 'ਚ ਕਾਮਯਾਬ ਹੋਈ ਹੈ। ਸੂਡਾਨ ਵਿੱਚ ਘਰੇਲੂ ਯੁੱਧ ਦੇ ਦੌਰਾਨ ਆਪਰੇਸ਼ਨ ਕਾਵੇਰੀ ਦੇ ਤਹਿਤ ਭਾਰਤੀਆਂ ਨੂੰ ਬਾਹਰ ਕੱਢਿਆ ਜਾ ਰਿਹਾ ਹੈ। ਇਸ ਦੇ ਦੂਜੇ ਦਿਨ ਬੁੱਧਵਾਰ ਦੇਰ ਰਾਤ, 360 ਨਾਗਰਿਕਾਂ ਦਾ ਪਹਿਲਾ ਜੱਥਾ ਜੇਦਾਹ ਤੋਂ ਨਵੀਂ ਦਿੱਲੀ ਹਵਾਈ ਅੱਡੇ 'ਤੇ ਪਹੁੰਚਿਆ। ਹਵਾਈ ਅੱਡੇ 'ਤੇ ਲੋਕਾਂ ਨੇ 'ਭਾਰਤ ਮਾਤਾ ਦੀ ਜੈ, ਭਾਰਤੀ ਫੌਜ ਜ਼ਿੰਦਾਬਾਦ, ਨਰਿੰਦਰ ਮੋਦੀ ਜ਼ਿੰਦਾਬਾਦ' ਦੇ ਨਾਅਰੇ ਲਾਏ।
ਸੁਡਾਨ ਤੋਂ ਬਚਾਈ ਗਈ ਇੱਕ ਕੁੜੀ ਨੇ ਕਿਹਾ - ਸਾਨੂੰ ਉੱਥੇ ਕਿਸੇ ਵੀ ਸਮੇਂ ਮਾਰਿਆ ਜਾ ਸਕਦਾ ਸੀ। ਹੁਣ ਤੱਕ 1100 ਭਾਰਤੀਆਂ ਨੂੰ ਸਮੁੰਦਰੀ ਅਤੇ ਹਵਾਈ ਮਾਰਗ ਰਾਹੀਂ ਸੂਡਾਨ ਤੋਂ ਸਾਊਦੀ ਅਰਬ ਲਿਆਂਦਾ ਗਿਆ ਹੈ। ਇਨ੍ਹਾਂ ਵਿੱਚੋਂ 360 ਭਾਰਤੀ ਬੁੱਧਵਾਰ ਰਾਤ ਜੇਦਾਹ ਤੋਂ ਨਵੀਂ ਦਿੱਲੀ ਪੁੱਜੇ। ਬਾਕੀ ਸਾਰੇ ਜੇਦਾਹ ਵਿੱਚ ਹਨ। ਉਨ੍ਹਾਂ ਨੂੰ ਜਲਦੀ ਹੀ ਭਾਰਤ ਲਿਆਂਦਾ ਜਾਵੇਗਾ। ਸੂਡਾਨ ਵਿੱਚ ਘਰੇਲੂ ਯੁੱਧ ਤੋਂ ਪਹਿਲਾਂ ਭਾਰਤੀਆਂ ਦੀ ਗਿਣਤੀ 4,000 ਤੋਂ ਵੱਧ ਸੀ।
ਦਿੱਲੀ ਹਵਾਈ ਅੱਡੇ 'ਤੇ, ਜੋਤੀ ਨੇ ਕਿਹਾ, 'ਸਾਨੂੰ ਨਹੀਂ ਪਤਾ ਸੀ ਕਿ ਸਾਡੇ ਵਿੱਚੋਂ ਕੌਣ ਬਚੇਗਾ। ਅਸੀਂ ਘਰਾਂ ਨੂੰ ਬੰਬਾਂ ਨਾਲ ਉਡਾਉਂਦੇ ਦੇਖਿਆ। ਦਫਤਰ ਦੇ ਸਾਥੀਆਂ ਨੂੰ ਬੰਦੂਕ ਦੀ ਨੋਕ 'ਤੇ ਬੰਨੇ ਹੋਇਆ ਵੇਖਿਆ। ਅਸੀਂ ਆਪਣੇ ਨਾਲ ਪੈਸੇ ਵੀ ਨਹੀਂ ਲਿਆਏ, ਕਿਉਂਕਿ ਉੱਥੇ ਦੀ ਫੌਜ ਸਾਨੂੰ ਲੁੱਟ ਸਕਦੀ ਸੀ ਅਤੇ ਮਾਰ ਸਕਦੀ ਸੀ । ਕੁਝ ਲੋਕਾਂ ਨੇ ਕਿਹਾ ਕਿ ਸਾਡੀਆਂ ਅੱਖਾਂ ਸਾਹਮਣੇ ਗੋਲੀਬਾਰੀ ਹੋ ਰਹੀ ਸੀ । ਇੱਕ ਨੌਜਵਾਨ ਨੇ ਦੱਸਿਆ ਕਿ ਸਾਨੂੰ ਖਾਣਾ ਨਹੀਂ ਮਿਲ ਰਿਹਾ ਸੀ। ਇਹ 2-3 ਦਿਨ ਚੱਲਦਾ ਰਿਹਾ। ਸੁਡਾਨ ਆਰਮਡ ਫੋਰਸਿਜ਼ ਧੜੇ ਆਰਐਸਐਫ ਦਾ ਟੈਂਟ ਸਾਡੀ ਕੰਪਨੀ ਦੇ ਨੇੜੇ ਲਗਾਇਆ ਗਿਆ ਸੀ। ਸਵੇਰੇ ਸੁਰੱਖਿਆ ਬਲਾਂ ਨੇ ਕੰਪਨੀ ਵਿੱਚ ਦਾਖਲ ਹੋ ਕੇ ਸਾਨੂੰ ਲੁੱਟ ਲਿਆ। ਉਨ੍ਹਾਂ ਨੇ ਸਾਨੂੰ 8 ਘੰਟੇ ਤੱਕ ਬੰਧਕ ਬਣਾ ਕੇ ਰੱਖਿਆ। ਉਨ੍ਹਾਂ ਨੇ ਸਾਡੀ ਛਾਤੀ 'ਤੇ ਰਾਈਫਲ ਰੱਖ ਕੇ ਸਾਨੂੰ ਲੁੱਟ ਲਿਆ। ਸਾਡੇ ਮੋਬਾਈਲ ਅਤੇ ਪੈਸੇ ਲੈ ਗਏ।
ਭਾਰਤੀ ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਅਰਿੰਦਮ ਬਾਗਚੀ ਨੇ ਕਿਹਾ, 'ਆਪ੍ਰੇਸ਼ਨ ਕਾਵੇਰੀ ਤਹਿਤ ਹੁਣ ਤੱਕ ਸੁਡਾਨ ਤੋਂ 1100 ਭਾਰਤੀਆਂ ਨੂੰ ਕੱਢਿਆ ਜਾ ਚੁੱਕਾ ਹੈ।' ਇਹ ਬਚਾਅ ਕਾਰਜ ਜਲ ਸੈਨਾ ਦੇ ਜਹਾਜ਼ ਆਈਐਨਐਸ ਸੁਮੇਧਾ ਅਤੇ ਭਾਰਤੀ ਹਵਾਈ ਸੈਨਾ ਦੇ ਸੀ-130 ਜੇ ਜਹਾਜ਼ ਦੁਆਰਾ ਕੀਤਾ ਜਾ ਰਿਹਾ ਹੈ। ਸੂਡਾਨ ਤੋਂ ਪਹਿਲੇ ਜੱਥੇ ਵਿੱਚ 278 ਲੋਕਾਂ ਨੂੰ ਬਚਾਇਆ ਗਿਆ ਸੀ। ਦੂਜੇ ਅਤੇ ਤੀਜੇ ਵਿੱਚ 121 ਅਤੇ 135 ਲੋਕਾਂ ਨੂੰ ਬਾਹਰ ਕੱਢਿਆ ਗਿਆ। ਚੌਥੇ ਅਤੇ ਪੰਜਵੇਂ ਬੈਚ ਵਿੱਚ, 136 ਅਤੇ 297 ਲੋਕਾਂ ਨੂੰ ਏਅਰਲਿਫਟ ਕੀਤਾ ਗਿਆ ਸੀ। ਦੂਜੇ ਪਾਸੇ ਵੀਰਵਾਰ ਸਵੇਰੇ ਛੇਵੇਂ ਬੈਚ 'ਚ 128 ਲੋਕਾਂ ਨੂੰ ਸੁਡਾਨ ਤੋਂ ਜੇਦਾਹ ਲਿਆਂਦਾ ਗਿਆ ਹੈ।
