ਸ਼ਕੁਨੀ ਮਾਮਾ ਦੇ ਨਾਂ ਨਾਲ ਮਸ਼ਹੂਰ ਗੁਫੀ ਪੇਂਟਲ ਦਾ ਮੁੰਬਈ ਦੇ ਇਕ ਹਸਪਤਾਲ 'ਚ ਦਿਹਾਂਤ ਹੋ ਗਿਆ ਹੈ। ਗੁਫੀ ਪੇਂਟਲ ਦੇ ਭਤੀਜੇ ਹਿਤੇਨ ਪੇਂਟਲ ਨੇ ਦੱਸਿਆ ਕਿ ਗੁਫੀ ਪੇਂਟਲ, ਜੋ ਕਿ ਉਮਰ ਦੀਆਂ ਕਈ ਬੀਮਾਰੀਆਂ ਤੋਂ ਪੀੜਤ ਸੀ, ਦੀ ਦਿਲ ਦਾ ਦੌਰਾ ਪੈਣ ਕਾਰਨ ਮੌਤ ਹੋ ਗਈ, ਉਹ 78 ਸਾਲ ਦੇ ਸਨ।
ਪੇਂਟਲ ਪਿਛਲੇ ਕਈ ਦਿਨਾਂ ਤੋਂ ਮੁੰਬਈ ਅੰਧੇਰੀ ਦੇ ਹਸਪਤਾਲ 'ਚ ਭਰਤੀ ਸਨ। ਉਨ੍ਹਾਂ ਦੇ ਕੋ-ਸਟਾਰ ਸੁਰਿੰਦਰ ਪਾਲ ਨੇ ਮੌਤ ਦੀ ਪੁਸ਼ਟੀ ਕੀਤੀ ਹੈ। ਉਨ੍ਹਾਂ ਦਾ ਅੰਤਿਮ ਸੰਸਕਾਰ ਅੱਜ ਸ਼ਾਮ 4 ਵਜੇ ਕੀਤਾ ਜਾਵੇਗਾ। ਜਦੋਂ ਗੁਫੀ ਦੀ ਸਿਹਤ ਵਿਗੜੀ ਤਾਂ ਉਹ ਫਰੀਦਾਬਾਦ ਵਿੱਚ ਸਨ। ਉਨ੍ਹਾਂ ਨੂੰ ਪਹਿਲਾਂ ਫਰੀਦਾਬਾਦ ਦੇ ਇੱਕ ਹਸਪਤਾਲ ਵਿੱਚ ਭਰਤੀ ਕਰਵਾਇਆ ਗਿਆ ਅਤੇ ਫਿਰ ਮੁੰਬਈ ਲਿਆਂਦਾ ਗਿਆ।
ਗੁਫੀ 80 ਦੇ ਦਹਾਕੇ ਵਿੱਚ ਕਈ ਫਿਲਮਾਂ ਅਤੇ ਟੀਵੀ ਸ਼ੋਅ ਵਿੱਚ ਨਜ਼ਰ ਆਏ ਸਨ। ਹਾਲਾਂਕਿ, ਗੁਫੀ ਨੂੰ ਅਸਲੀ ਪਛਾਣ 1988 ਵਿੱਚ ਬੀਆਰ ਚੋਪੜਾ ਦੇ ਸੁਪਰਹਿੱਟ ਸ਼ੋਅ 'ਮਹਾਭਾਰਤ' ਤੋਂ ਮਿਲੀ। ਉਸਨੇ ਸ਼ੋਅ ਵਿੱਚ ਸ਼ਕੁਨੀ ਮਾਮਾ ਦਾ ਕਿਰਦਾਰ ਨਿਭਾਇਆ ਸੀ। ਗੁਫੀ ਨੂੰ ਆਖਰੀ ਵਾਰ ਸਟਾਰ ਭਾਰਤ ਦੇ ਸ਼ੋਅ 'ਜੈ ਕਨ੍ਹਈਆ ਲਾਲ ਕੀ' 'ਚ ਦੇਖਿਆ ਗਿਆ ਸੀ। ਅਦਾਕਾਰੀ ਦੀ ਦੁਨੀਆ ਵਿੱਚ ਆਉਣ ਤੋਂ ਪਹਿਲਾਂ, ਗੁਫੀ ਪੈਂਟਲ ਆਰਮੀ ਵਿੱਚ ਸੀ।
ਮੀਡਿਆ ਨਾਲ ਵਿਸ਼ੇਸ਼ ਗੱਲਬਾਤ ਵਿੱਚ ਪੇਂਟਲ ਨੇ ਦੱਸਿਆ ਸੀ ਕਿ 1962 ਵਿੱਚ ਜਦੋਂ ਭਾਰਤ-ਚੀਨ ਯੁੱਧ ਚੱਲ ਰਿਹਾ ਸੀ ਤਾਂ ਉਹ ਇੰਜੀਨੀਅਰਿੰਗ ਦੀ ਪੜ੍ਹਾਈ ਕਰ ਰਿਹਾ ਸੀ। ਜੰਗ ਦੌਰਾਨ ਵੀ ਕਾਲਜ ਵਿੱਚ ਫੌਜ ਦੀ ਭਰਤੀ ਚੱਲ ਰਹੀ ਸੀ। ਗੂਫੀ ਹਮੇਸ਼ਾ ਫੌਜ ਵਿਚ ਭਰਤੀ ਹੋਣਾ ਚਾਹੁੰਦਾ ਸੀ। ਉਨ੍ਹਾਂ ਦੀ ਪਹਿਲੀ ਪੋਸਟਿੰਗ ਚੀਨ ਸਰਹੱਦ 'ਤੇ ਆਰਮੀ ਆਰਟੀਲਰੀ 'ਚ ਸੀ। ਪੈਂਟਲ ਨੇ ਦੱਸਿਆ ਸੀ- ਸਰਹੱਦ 'ਤੇ ਮਨੋਰੰਜਨ ਲਈ ਕੋਈ ਟੀਵੀ ਅਤੇ ਰੇਡੀਓ ਨਹੀਂ ਸੀ, ਇਸ ਲਈ ਅਸੀਂ (ਫੌਜ ਦੇ ਜਵਾਨ) ਸਰਹੱਦ 'ਤੇ ਰਾਮਲੀਲਾ ਕਰਦੇ ਸੀ।
ਗੁਫੀ ਨੇ ਦੱਸਿਆ ਕਿ ਮੈਂ ਰਾਮਲੀਲਾ ਵਿਚ ਸੀਤਾ ਦਾ ਕਿਰਦਾਰ ਨਿਭਾਇਆ ਸੀ ਅਤੇ ਰਾਵਣ ਦੇ ਭੇਸ ਵਿਚ ਇਕ ਵਿਅਕਤੀ ਸਕੂਟਰ 'ਤੇ ਆਉਂਦਾ ਸੀ ਅਤੇ ਮੈਨੂੰ ਅਗਵਾ ਕਰਦਾ ਸੀ। ਮੈਨੂੰ ਅਦਾਕਾਰੀ ਦਾ ਸ਼ੌਕ ਸੀ, ਇਸ ਤੋਂ ਕੁਝ ਸਿਖਲਾਈ ਵੀ ਲਈ ਸੀ। ਜਦੋਂ ਅਦਾਕਾਰੀ ਵਿੱਚ ਦਿਲਚਸਪੀ ਵਧਣ ਲੱਗੀ ਤਾਂ ਗੁਫੀ ਆਪਣੇ ਛੋਟੇ ਭਰਾ ਕੰਵਰਜੀਤ ਪੇਂਟਲ ਦੇ ਕਹਿਣ 'ਤੇ 1969 ਵਿੱਚ ਮੁੰਬਈ ਆ ਗਏ। ਮਾਡਲਿੰਗ ਅਤੇ ਐਕਟਿੰਗ ਸਿੱਖੀ ਅਤੇ ਕਈ ਫਿਲਮਾਂ ਵਿੱਚ ਸਹਾਇਕ ਨਿਰਦੇਸ਼ਕ ਵਜੋਂ ਵੀ ਕੰਮ ਕੀਤਾ। ਇਸ ਦੌਰਾਨ ਉਨ੍ਹਾਂ ਨੂੰ ਬੀ ਆਰ ਚੋਪੜਾ ਦੀ ਮਹਾਭਾਰਤ ਵਿੱਚ ਕਾਸਟਿੰਗ ਡਾਇਰੈਕਟਰ ਵਜੋਂ ਵੀ ਕੰਮ ਕਰਨ ਦਾ ਮੌਕਾ ਮਿਲਿਆ।
