ਦੇਸ਼ ਵਿਚ UPSC ਦਾ ਨਤੀਜਾ ਐਲਾਨਿਆ ਜਾ ਚੁਕਿਆ ਹੈ। ਚੰਡੀਗੜ੍ਹ-ਪੰਜਾਬ ਦੇ ਨੌਜਵਾਨਾਂ ਦਾ ਪ੍ਰਦਰਸ਼ਨ ਯੂਨੀਅਨ ਪਬਲਿਕ ਸਰਵਿਸ ਕਮਿਸ਼ਨ (ਯੂ.ਪੀ.ਐੱਸ.ਸੀ.) ਦੀ ਪ੍ਰੀਖਿਆ 'ਚ ਵੀ ਬਿਹਤਰ ਰਿਹਾ ਹੈ। ਚੰਡੀਗੜ੍ਹ ਦੇ ਸੈਕਟਰ 7 ਦੀ ਅੰਕਿਤਾ ਪੰਵਾਰ ਨੇ ਚੌਥੀ ਕੋਸ਼ਿਸ਼ ਵਿੱਚ 28ਵਾਂ ਰੈਂਕ ਹਾਸਲ ਕੀਤਾ ਹੈ। ਉਸਨੇ ਆਪਣੀ ਸਕੂਲੀ ਪੜ੍ਹਾਈ ਸਰਕਾਰੀ ਮਾਡਲ ਸੀਨੀਅਰ ਸੈਕੰਡਰੀ ਸਕੂਲ, ਸੈਕਟਰ-19, ਚੰਡੀਗੜ੍ਹ ਤੋਂ ਕੀਤੀ ਹੈ। ਉਹ 2013 ਦੀ CBSE ਜਮਾਤ 12ਵੀਂ ਦੀ ਪ੍ਰੀਖਿਆ ਵਿੱਚ 97.6 ਫੀਸਦੀ ਅੰਕਾਂ ਨਾਲ ਚੰਡੀਗੜ੍ਹ ਟਾਪਰ ਵੀ ਰਹੀ ਸੀ। ਇਸ ਤੋਂ ਬਾਅਦ ਉਹ ਆਈਆਈਟੀ ਰੁੜਕੀ ਵਿੱਚ ਦਾਖਲ ਹੋ ਗਈ। ਬਾਅਦ ਵਿੱਚ ਬੰਗਲੌਰ ਵਿੱਚ ਇੱਕ ਫਰਮ ਵਿੱਚ ਦੋ ਸਾਲ ਕੰਮ ਕੀਤਾ। ਇਸ ਤੋਂ ਬਾਅਦ ਅਕਤੂਬਰ 2019 'ਚ ਨੌਕਰੀ ਛੱਡ ਕੇ ਸਿਵਲ ਸੇਵਾਵਾਂ ਪ੍ਰੀਖਿਆ ਦੀ ਤਿਆਰੀ 'ਤੇ ਧਿਆਨ ਦਿੱਤਾ।
ਜਦੋਂ ਕਿ ਮੋਹਾਲੀ ਜ਼ਿਲ੍ਹੇ ਦੇ ਜ਼ੀਰਕਪੁਰ ਤੋਂ ਡਾ. ਅਦਿੱਤਿਆ ਨੇ 70ਵਾਂ ਸਥਾਨ ਹਾਸਲ ਕੀਤਾ। ਡਾ. ਆਦਿਤਿਆ ਨੇ ਪਹਿਲੀ ਕੋਸ਼ਿਸ਼ ਵਿੱਚ ਹੀ ਸਫਲਤਾ ਹਾਸਲ ਕੀਤੀ। ਅੰਕਿਤਾ ਦਾਨਿਕਸ਼ ਕੇਡਰ ਦੇ ਅਧੀਨ ਸਿਖਲਾਈ ਲੈ ਰਹੀ ਹੈ। ਉਸਨੇ ਸਾਲ 2020 ਵਿੱਚ ਦੂਜੀ ਕੋਸ਼ਿਸ਼ ਵਿੱਚ 321ਵਾਂ ਰੈਂਕ ਹਾਸਲ ਕੀਤਾ ਸੀ। ਡਾ. ਆਦਿਤਿਆ ਨੇ ਜੀਐਮਐਸਐਚ-32 ਤੋਂ ਐਮਬੀਬੀਐਸ ਦੀ ਪੜ੍ਹਾਈ ਕੀਤੀ ਹੈ ਅਤੇ ਕੋਵਿਡ ਵਿੱਚ ਵੀ ਸੇਵਾਵਾਂ ਦਿੱਤੀਆਂ ਹਨ।
ਲਹਿਰਾਗਾਗਾ, ਸੰਗਰੂਰ ਦੇ ਰੌਬਿਨ ਬਾਂਸਲ ਨੇ 135ਵਾਂ ਰੈਂਕ ਹਾਸਲ ਕਰਕੇ ਇਲਾਕੇ ਦਾ ਨਾਂ ਰੌਸ਼ਨ ਕੀਤਾ ਹੈ। ਇਸ ਤੋਂ ਪਹਿਲਾਂ ਰੌਬਿਨ ਬਾਂਸਲ ਦੀ ਛੋਟੀ ਭੈਣ ਐਲੀਜ਼ਾ ਬਾਂਸਲ ਨੇ ਵੀ ਮੈਡੀਕਲ ਪ੍ਰੀਖਿਆ ਵਿੱਚ ਦੇਸ਼ ਭਰ ਵਿੱਚੋਂ ਪਹਿਲਾ ਸਥਾਨ ਹਾਸਲ ਕੀਤਾ ਸੀ। ਰੌਬਿਨ ਨੂੰ ਇਹ ਸਫਲਤਾ ਚੌਥੀ ਕੋਸ਼ਿਸ਼ ਵਿੱਚ ਮਿਲੀ। ਰੌਬਿਨ ਆਈਪੀਐਸ ਅਧਿਕਾਰੀ ਬਣ ਕੇ ਪੁਲਿਸ ਸਿਸਟਮ ਵਿੱਚ ਸੁਧਾਰ ਕਰਨਾ ਚਾਹੁੰਦਾ ਹੈ।
ਜਦਕਿ ਜਲੰਧਰ ਦੀ ਰੁਸ਼ਾਲੀ ਕਲੇਰ ਨੇ 492 ਰੈਂਕ ਹਾਸਲ ਕੀਤਾ ਹੈ। ਰੁਸ਼ਾਲੀ ਨੇ ਦੱਸਿਆ ਕਿ ਉਹ ਪਿਛਲੇ ਦੋ ਸਾਲਾਂ ਤੋਂ ਯੂਪੀਐਸਸੀ ਦੀ ਤਿਆਰੀ ਕਰ ਰਹੀ ਸੀ। ਰੁਸ਼ਾਲੀ ਦੀ ਮਾਂ ਬਬੀਤਾ ਕਲੇਰ ਆਈਏਐਸ ਅਧਿਕਾਰੀ ਹੈ। ਰੁਸ਼ਾਲੀ ਦਾ ਕਹਿਣਾ ਹੈ ਕਿ ਬਚਪਨ ਤੋਂ ਹੀ ਉਹ ਆਪਣੀ ਮਾਂ ਵਾਂਗ ਆਈਏਐਸ ਅਫਸਰ ਬਣਨਾ ਚਾਹੁੰਦੀ ਸੀ। ਰੁਸ਼ਾਲੀ ਕਦੇ ਕੋਚਿੰਗ ਕਲਾਸਾਂ ਵਿੱਚ ਨਹੀਂ ਗਈ ਅਤੇ ਘਰ ਵਿੱਚ ਪੜ੍ਹੀ। ਜਦੋਂ ਇੰਟਰਵਿਊ ਦੀ ਵਾਰੀ ਆਈ ਤਾਂ ਮਾਂ ਨੇ ਉਸ ਨੂੰ ਪਰਸਨੈਲਿਟੀ ਟੈਸਟ ਲਈ ਤਿਆਰ ਕੀਤਾ। ਉਸਦੇ ਪਿਤਾ ਸਟੀਫਨ ਕਲੇਰ ਇੱਕ ਸਿਆਸਤਦਾਨ ਅਤੇ ਉਦਯੋਗਪਤੀ ਹਨ।
