29 ਮਈ ਨੂੰ ਸਿੱਧੂ ਮੂਸੇਵਾਲਾ ਦੇ ਕਤਲ ਨੂੰ ਹੋਏ ਇੱਕ ਸਾਲ ਹੋ ਗਿਆ ਹੈ। ਮਾਨਸਾ ਦੀਆਂ ਸੜਕਾਂ 'ਤੇ ਸਿੱਧੂ ਮੂਸੇਵਾਲਾ ਦੀ ਮਾਤਾ ਚਰਨ ਕੌਰ ਵੱਲੋਂ ਪ੍ਰਸ਼ੰਸਕਾਂ ਸਮੇਤ ਕੈਂਡਲ ਮਾਰਚ ਕੱਢਿਆ ਗਿਆ। ਜਿਸ ਵਿੱਚ ਚਰਨ ਕੌਰ ਨੇ ਵੀ ਲੋਕਾਂ ਨੂੰ ਸੰਬੋਧਨ ਕੀਤਾ। ਚਰਨ ਕੌਰ ਨੇ ਕਿਹਾ ਕਿ ਅੱਜ ਵੀ ਅਸੀਂ ਉਸੇ ਥਾਂ 'ਤੇ ਖੜ੍ਹੇ ਹਾਂ, ਜਿੱਥੇ ਇੱਕ ਸਾਲ ਪਹਿਲਾਂ ਖੜ੍ਹੇ ਸੀ।
ਚਰਨ ਕੌਰ ਨੇ ਕਿਹਾ ਕਿ ਅਸੀਂ ਸਿੱਧੂ ਮੂਸੇਵਾਲਾ ਮਾਮਲੇ 'ਚ ਸਰਕਾਰ ਨੂੰ ਜਗਾਉਣਾ ਚਾਹੁੰਦੇ ਹਾਂ। ਹਰ ਵਾਰ ਸਰਕਾਰ ਬੋਲਦੀ ਹੈ, ਉਸਨੂੰ ਫੜ ਲਿਆ ਹੈ, ਉਸਨੂੰ ਛੱਡ ਦਿਤਾ ਹੈ। ਪਰ ਹੁਣ ਇਹ ਦੁਬਾਰਾ ਨਾ ਕਹੋ ਕਿ ਸਿੱਧੂ ਦੇ ਮਾਪੇ ਸਾਡੇ ਨਾਲ ਸਹਿਮਤ ਹਨ ਅਤੇ ਅਸੀਂ ਇੰਨੇ ਲੋਕਾਂ ਨੂੰ ਫੜਿਆ ਅਤੇ ਬਹੁਤ ਸਾਰੇ ਮਾਰੇ। ਪਰ ਇਹ ਸਾਨੂੰ ਮਨਜ਼ੂਰ ਨਹੀਂ ਹੈ। ਸਾਡਾ ਇਨਸਾਫ ਹੈ, ਮਾਸਟਰਮਾਈਂਡ ਨੂੰ ਫੜਨਾ। ਮਾਤਾ ਚਰਨ ਕੌਰ ਨੇ ਆਪਣੇ ਪੁੱਤਰ ਸ਼ੁਭਦੀਪ ਸਿੰਘ ਉਰਫ਼ ਸਿੱਧੂ ਮੂਸੇਵਾਲਾ ਨੂੰ ਅਗਲੇ ਦਿਨ ਅੱਧੀ ਰਾਤ 12 ਵਜੇ ਯਾਦ ਕਰਦਿਆਂ ਸੋਸ਼ਲ ਮੀਡੀਆ 'ਤੇ ਪੋਸਟ ਸਾਂਝੀ ਕੀਤੀ। ਉਥੇ ਹੀ ਜਵਾਹਰਕੇ ਵਿਖੇ ਪਾਠ ਰੱਖਿਆ ਗਿਆ, ਜਿੱਥੇ ਮਾਤਾ ਚਰਨ ਕੌਰ ਪੁੱਜੇ।
ਚਰਨ ਕੌਰ ਨੇ ਕਿਹਾ ਕਿ ਮੇਰੇ ਲਈ ਇਸ ਤੋਂ ਵੱਡੀ ਸਜ਼ਾ ਕੀ ਹੋ ਸਕਦੀ ਹੈ, ਲੰਮੀ ਉਮਰ ਦੀਆਂ ਖੁਸ਼ੀਆਂ ਜਿਸ ਲਈ ਮੈਂ ਮੰਗਦੀ ਸੀ, ਅੱਜ ਉਸਨੂੰ ਆਪਣੀਆਂ ਅੱਖਾਂ ਸਾਹਮਣੇ ਦੇਖਿਆ ਇੱਕ ਸਾਲ ਹੋ ਗਿਆ ਹੈ। ਬਿਨਾਂ ਕੋਈ ਕਸੂਰ, ਬਿਨਾਂ ਕਿਸੇ ਜੁਰਮ ਦੇ, ਕੁਝ ਸ਼ਰਾਰਤੀ ਲੋਕ ਮੇਰੇ ਬੱਚੇ ਨੂੰ ਮੇਰੇ ਕੋਲੋਂ ਖੋਹ ਕੇ ਲੈ ਗਏ। ਅੱਜ ਇੱਕ ਸਾਲ ਹੋ ਗਿਆ ਬੇਟਾ, ਮੈਂ ਤੈਨੂੰ ਜੱਫੀ ਨਹੀਂ ਪਾਈ, ਨਾ ਕੋਈ ਦੁੱਖ ਸਾਂਝਾ ਕੀਤਾ ਹੈ।
ਪੰਜਾਬ ਪ੍ਰਦੇਸ਼ ਕਾਂਗਰਸ ਕਮੇਟੀ ਦੇ ਸਾਬਕਾ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਨੇ ਟਵੀਟ ਕੀਤਾ, "ਇੱਕ ਪਿਤਾ ਦੀ ਇਨਸਾਫ਼ ਦੀ ਮੰਗ ਦਾ ਬੋਲ਼ੀ ਅਤੇ ਗੂੰਗੀ ਰਾਜ ਸਰਕਾਰ 'ਤੇ ਕੋਈ ਅਸਰ ਨਹੀਂ ਹੋਇਆ। ਉਸਦੀ ਸੁਰੱਖਿਆ ਵਿੱਚ ਗੰਭੀਰ ਕਮੀਆਂ ਕਾਰਨ ਉਸ ਦਾ ਘਿਨੌਣਾ ਕਤਲ ਹੋਇਆ ਹੈ।" ਕੁਝ ਸਬਕ ਸਿੱਖਣ ਲਈ ਹਨ, ਰਾਜ ਸਰਕਾਰ ਨੂੰ ਪਿਤਾ 'ਤੇ ਦੋਸ਼ ਲਗਾਉਣ ਦੀ ਬਜਾਏ ਜਾਂਚ ਕਰਨੀ ਚਾਹੀਦੀ ਹੈ। ਪੰਜਾਬ ਪ੍ਰਦੇਸ਼ ਕਾਂਗਰਸ ਕਮੇਟੀ ਦੇ ਪ੍ਰਧਾਨ ਅਮਰਿੰਦਰ ਸਿੰਘ ਰਾਜਾ ਵਡਿੰਗ ਨੇ ਕਿਹਾ- ਮੈਂ ਆਪਣੇ ਬਹੁਤ ਹੀ ਪਿਆਰੇ ਮਿੱਤਰ ਭਰਾ ਸ਼ੁਭਦੀਪ ਸਿੰਘ ਸਿੱਧੂ ਮੂਸੇਵਾਲਾ ਨੂੰ ਉਨ੍ਹਾਂ ਦੀ ਪਹਿਲੀ ਬਰਸੀ 'ਤੇ ਸ਼ਰਧਾਂਜਲੀ ਭੇਟ ਕਰਦਾ ਹਾਂ। ਮੈਂ ਬਹੁਤ ਦੁਖੀ ਹਾਂ ਕਿ ਮੇਰਾ ਭਰਾ ਸਾਨੂੰ ਇੰਨੀ ਜਲਦੀ ਛੱਡ ਗਿਆ।
