ਫੀਫਾ ਵਿਸ਼ਵ ਕੱਪ 2022 'ਚ ਅਰਜਨਟੀਨਾ ਦੀ ਜਿੱਤ ਤੋਂ ਬਾਅਦ ਦੇਸ਼ ਦੇ ਲੋਕਾਂ 'ਚ ਖੁਸ਼ੀ ਦੀ ਲਹਿਰ ਹੈ। ਫੀਫਾ ਵਿਸ਼ਵ ਕੱਪ 2022 ਦੇ ਫਾਈਨਲ 'ਚ ਫਰਾਂਸ ਅਤੇ ਅਰਜਨਟੀਨਾ ਵਿਚਾਲੇ ਸਖਤ ਟੱਕਰ ਦੇਖਣ ਨੂੰ ਮਿਲੀ। 3-3 ਦੇ ਡਰਾਅ ਤੋਂ ਬਾਅਦ ਅਰਜਨਟੀਨਾ ਨੇ ਪੈਨਲਟੀ ਸ਼ੂਟਆਊਟ ਵਿੱਚ ਫਰਾਂਸ ਨੂੰ 4-2 ਨਾਲ ਹਰਾਇਆ। ਇਸ ਜਿੱਤ 'ਚ ਮਹਾਨ ਫੁੱਟਬਾਲਰ ਲਿਓਨਲ ਮੇਸੀ ਦਾ ਵੀ ਵੱਡਾ ਹੱਥ ਸੀ।
ਵਿਸ਼ਵ ਕੱਪ ਜਿੱਤ ਦੇ ਨਾਲ ਹੀ ਮੇਸੀ ਦਾ ਸਭ ਤੋਂ ਵੱਡਾ ਸੁਪਨਾ ਵੀ ਪੂਰਾ ਹੋ ਗਿਆ। ਅਰਜਨਟੀਨਾ ਦੀ ਜਿੱਤ ਤੋਂ ਬਾਅਦ ਉਨ੍ਹਾਂ ਦੇ ਦੇਸ਼ 'ਚ ਖੁਸ਼ੀ ਦਾ ਮਾਹੌਲ ਹੈ ਅਤੇ ਲੱਖਾਂ ਲੋਕ ਸੜਕਾਂ 'ਤੇ ਉਤਰ ਰਹੇ ਹਨ। 36 ਸਾਲਾਂ ਬਾਅਦ ਅਰਜਨਟੀਨਾ ਦੀ ਵਿਸ਼ਵ ਕੱਪ ਜਿੱਤ ਦਾ ਜਸ਼ਨ ਮਨਾਉਣ ਅਤੇ ਆਪਣੇ ਮਨਪਸੰਦ ਖਿਡਾਰੀਆਂ ਦੀ ਝਲਕ ਦੇਖਣ ਲਈ ਲੱਖਾਂ ਲੋਕ ਬਿਊਨਸ ਆਇਰਸ ਦੀਆਂ ਸੜਕਾਂ 'ਤੇ ਉਤਰ ਆਏ, ਜਿਸ ਕਾਰਨ ਟ੍ਰੈਫਿਕ ਜਾਮ ਹੋ ਗਿਆ ਅਤੇ ਪਰੇਡ ਰੁਕ ਗਈ।
ਲੋਕਾਂ ਨੇ ਝੰਡੇ ਚੁੱਕੇ ਹੋਏ ਸਨ, ਉਹ ਪੂਰੇ ਜੋਸ਼ ਨਾਲ ਨੱਚ ਰਹੇ ਸਨ ਅਤੇ ਗਾ ਰਹੇ ਸਨ, ਪਰ ਉਨ੍ਹਾਂ ਦੀ ਗਿਣਤੀ ਇੰਨੀ ਜ਼ਿਆਦਾ ਸੀ, ਕਿ ਇਸ ਕਾਰਨ ਖਿਡਾਰੀਆਂ ਦੀ ਪਰੇਡ ਨੂੰ ਖੁੱਲ੍ਹੀ ਬੱਸ ਵਿਚ ਰੋਕ ਕੇ ਹੈਲੀਕਾਪਟਰ ਵਿਚ ਪਰੇਡ ਕਰਨੀ ਪਈ। ਅਰਜਨਟੀਨਾ ਸਰਕਾਰ ਨੇ ਇਸ ਨੂੰ ਹਵਾਈ ਪਰੇਡ ਕਿਹਾ। ਰਾਸ਼ਟਰਪਤੀ ਅਲਬਰਟੋ ਫਰਨਾਂਡੇਜ਼ ਦੀ ਬੁਲਾਰਾ ਗੈਬਰੀਲਾ ਸੇਰੂਟੀ ਨੇ ਸੋਸ਼ਲ ਮੀਡੀਆ 'ਤੇ ਲਿਖਿਆ, "ਵਿਸ਼ਵ ਚੈਂਪੀਅਨਜ਼ ਹੈਲੀਕਾਪਟਰ ਦੁਆਰਾ ਪੂਰੇ ਰਸਤੇ ਦੀ ਉਡਾਣ ਭਰ ਰਹੇ ਹਨ, ਕਿਉਂਕਿ ਵੱਡੀ ਗਿਣਤੀ ਵਿੱਚ ਲੋਕਾਂ ਦੇ ਪਹੁੰਚਣ ਕਾਰਨ ਸੜਕ ਦੁਆਰਾ ਪਰੇਡ ਨੂੰ ਜਾਰੀ ਰੱਖਣਾ ਅਸੰਭਵ ਸੀ।
"ਹੈਲੀਕਾਪਟਰਾਂ ਨੇ ਬਿਊਨਸ ਆਇਰਸ ਵਿਚ ਉਨ੍ਹਾਂ ਥਾਵਾਂ 'ਤੇ ਉਡਾਣ ਭਰੀ ਜਿੱਥੇ ਪ੍ਰਸ਼ੰਸਕ ਇਕੱਠੇ ਹੋਏ ਸਨ। ਹੈਲੀਕਾਪਟਰ ਫਿਰ ਰਾਜਧਾਨੀ ਦੇ ਬਾਹਰ ਅਰਜਨਟੀਨਾ ਫੁਟਬਾਲ ਐਸੋਸੀਏਸ਼ਨ ਦੇ ਮੁੱਖ ਦਫਤਰ ਲਈ ਉੱਡ ਗਏ। ਕੁਝ ਪ੍ਰਸ਼ੰਸਕਾਂ ਨੇ ਅਜੇ ਵੀ ਸੜਕਾਂ 'ਤੇ ਜਸ਼ਨ ਮਨਾਇਆ, ਪਰ ਬਹੁਤ ਸਾਰੇ ਨਿਰਾਸ਼ ਸਨ ਕਿ ਉਹ 1986 ਤੋਂ ਬਾਅਦ ਪਹਿਲੀ ਵਾਰ ਵਿਸ਼ਵ ਕੱਪ ਜਿੱਤਣ ਵਾਲੀ ਆਪਣੀ ਟੀਮ ਦੀ ਝਲਕ ਨਹੀਂ ਦੇਖ ਸਕੇ। ਪਰ ਬਹੁਤ ਸਾਰੇ ਲੋਕ ਅਜਿਹੇ ਵੀ ਸਨ, ਜਿਨ੍ਹਾਂ ਨੇ ਵੱਡੀ ਗਿਣਤੀ 'ਚ ਪ੍ਰਸੰਸਕਾਂ ਦੇ ਪਹੁੰਚਣ ਕਾਰਨ ਸਰਕਾਰ ਦੀ ਮਜਬੂਰੀ ਨੂੰ ਸਮਝਿਆ ਅਤੇ ਇਸ ਲਈ ਉਹ ਜਸ਼ਨ 'ਚ ਡੁੱਬੇ ਰਹੇ।
