ਪਾਕਿਸਤਾਨ ਦੇ ਸਾਬਕਾ ਪ੍ਰਧਾਨ ਮੰਤਰੀ ਜ਼ੁਲਫਿਕਾਰ ਅਲੀ ਭੁੱਟੋ ਦੀ ਪੋਤੀ ਫਾਤਿਮਾ ਭੁੱਟੋ ਵਿਆਹ ਦੇ ਬੰਧਨ ਵਿੱਚ ਬੱਝ ਗਈ ਹੈ। ਇਸ ਦੌਰਾਨ ਫਾਤਿਮਾ ਨੇ ਆਪਣੇ ਵਿਆਹ ਤੋਂ ਬਾਅਦ ਹਿੰਦੂ ਮੰਦਰ ਜਾ ਕੇ ਨਵੀਂ ਮਿਸਾਲ ਕਾਇਮ ਕੀਤੀ ਹੈ। ਪਰ ਇਸ ਦੌਰਾਨ, ਫਾਤਿਮਾ ਭੁੱਟੋ ਦੇ ਹਿੰਦੂ ਮੰਦਰ ਦੇ ਦਰਸ਼ਨ ਨੇ ਪਾਕਿਸਤਾਨ ਵਿੱਚ ਹੰਗਾਮਾ ਮਚਾ ਦਿੱਤਾ ਹੈ।
ਫਾਤਿਮਾ ਦੇ ਇਸ ਕਦਮ ਨੇ ਸੋਸ਼ਲ ਮੀਡੀਆ 'ਤੇ ਪ੍ਰਤੀਕਿਰਿਆਵਾਂ ਦਾ ਹੜ੍ਹ ਸ਼ੁਰੂ ਕਰ ਦਿੱਤਾ ਹੈ। 40 ਸਾਲਾ ਫਾਤਿਮਾ ਪੇਸ਼ੇ ਤੋਂ ਲੇਖਕ ਅਤੇ ਕਾਲਮਨਵੀਸ ਹੈ। ਉਨ੍ਹਾਂ ਦਾ ਨਿਕਾਹ ਸਮਾਰੋਹ ਸ਼ੁੱਕਰਵਾਰ ਨੂੰ ਉਨ੍ਹਾਂ ਦੇ ਦਾਦਾ ਜੀ ਦੀ ਲਾਇਬ੍ਰੇਰੀ ਵਿੱਚ ਹੋਇਆ। ਉਨ੍ਹਾਂ ਦਾ ਵਿਆਹ ਇੱਕ ਅਮਰੀਕੀ ਨਾਗਰਿਕ ਗ੍ਰਾਹਮ ਨਾਲ ਹੋਇਆ ਹੈ। ਫਾਤਿਮਾ ਭੁੱਟੋ ਦੇ ਮਹਾਦੇਵ ਮੰਦਰ 'ਚ ਪਹੁੰਚਣ ਤੋਂ ਬਾਅਦ ਪਾਕਿਸਤਾਨ 'ਚ ਹਲਚਲ ਮਚ ਗਈ ਹੈ। ਕੁਝ ਲੋਕਾਂ ਨੇ ਉਸਦੀ ਤਾਰੀਫ ਕੀਤੀ ਹੈ, ਜਦੋਂ ਕਿ ਕੁਝ ਲੋਕਾਂ ਨੇ ਸਵਾਲ ਕੀਤਾ ਹੈ ਕਿ ਉਹ ਮੁਸਲਮਾਨ ਹੋ ਕੇ ਮੰਦਰ ਕਿਉਂ ਗਈ।
ਫਾਤਿਮਾ ਸਾਬਕਾ ਪ੍ਰਧਾਨ ਮੰਤਰੀ ਮਰਹੂਮ ਬੇਨਜ਼ੀਰ ਭੁੱਟੋ ਦੀ ਭਤੀਜੀ ਅਤੇ ਮੁਰਤਜ਼ਾ ਭੁੱਟੋ ਦੀ ਧੀ ਹੈ। ਉਨ੍ਹਾਂ ਦਾ ਵਿਆਹ ਸ਼ੁੱਕਰਵਾਰ ਨੂੰ ਕਰਾਚੀ ਵਿੱਚ ਫਾਤਿਮਾ ਭੁੱਟੋ ਦੇ ਦਾਦਾ ਜ਼ੁਲਫਿਕਾਰ ਅਲੀ ਭੁੱਟੋ ਦੀ ਲਾਇਬ੍ਰੇਰੀ ਵਿੱਚ ਇੱਕ ਸਾਦੇ ਸਮਾਗਮ ਵਿੱਚ ਹੋਇਆ ਸੀ । ਫਾਤਿਮਾ ਅਤੇ ਉਸ ਦੇ ਪਤੀ ਗ੍ਰਾਹਮ ਜਿਬਰਾਨ ਨੇ ਐਤਵਾਰ ਨੂੰ ਕਰਾਚੀ ਦੇ ਇਤਿਹਾਸਕ ਮਹਾਦੇਵ ਮੰਦਰ ਦੇ ਦਰਸ਼ਨ ਕਰਕੇ ਸੋਸ਼ਲ ਮੀਡੀਆ 'ਤੇ ਧੂਮ ਮਚਾ ਦਿਤੀ ਹੈ ।
ਫਾਤਿਮਾ ਭੁੱਟੋ ਅਤੇ ਉਸਦਾ ਪਤੀ ਹਿੰਦੂ ਸਿੰਧੀਆਂ ਨੂੰ ਸ਼ਰਧਾਂਜਲੀ ਦੇਣ ਲਈ ਮੰਦਰ ਪਹੁੰਚੇ ਸਨ ਜਿਨ੍ਹਾਂ ਦੀਆਂ ਜੜ੍ਹਾਂ ਕਰਾਚੀ ਤੋਂ ਹਨ। ਫਾਤਿਮਾ ਦਾ ਪਤੀ ਗ੍ਰਾਹਮ ਇੱਕ ਈਸਾਈ ਅਤੇ ਇੱਕ ਅਮਰੀਕੀ ਨਾਗਰਿਕ ਹੈ। ਫਾਤਿਮਾ ਦੇ ਨਾਲ ਉਸਦਾ ਭਰਾ ਜ਼ੁਲਫਿਕਾਰ ਅਲੀ ਭੁੱਟੋ ਜੂਨੀਅਰ ਅਤੇ ਹਿੰਦੂ ਨੇਤਾ ਵੀ ਸਨ। ਉਸਨੇ ਅਤੇ ਉਸਦੇ ਪਤੀ ਨੇ ਮੰਦਿਰ 'ਚ ਦੁੱਧ ਚੜ੍ਹਾਇਆ। ਦੱਸ ਦਈਏ ਕਿ ਫਾਤਿਮਾ ਦੇ ਪਿਤਾ ਮੁਰਤਜ਼ਾ ਭੁੱਟੋ ਦੀ ਸਤੰਬਰ 1996 'ਚ ਕਲਿਫਟਨ 'ਚ ਹੱਤਿਆ ਕਰ ਦਿੱਤੀ ਗਈ ਸੀ। ਮੁਰਤਜ਼ਾ ਦਾ ਛੋਟਾ ਭਰਾ ਸ਼ਾਹਨਵਾਜ਼ ਭੁੱਟੋ 1985 ਵਿੱਚ ਫਰਾਂਸ ਵਿੱਚ ਆਪਣੇ ਅਪਾਰਟਮੈਂਟ ਵਿੱਚ ਮ੍ਰਿਤਕ ਪਾਇਆ ਗਿਆ ਸੀ। ਜ਼ੁਲਫ਼ਕਾਰ ਅਲੀ ਭੁੱਟੋ ਨੂੰ ਤਤਕਾਲੀ ਫ਼ੌਜੀ ਤਾਨਾਸ਼ਾਹ ਜ਼ਿਆ ਉਲ ਹੱਕ ਨੇ ਅਪਰੈਲ 1979 ਵਿੱਚ ਫ਼ੌਜੀ ਤਖ਼ਤਾ ਪਲਟ ਕੇ ਫਾਂਸੀ ਦੇ ਦਿੱਤੀ ਸੀ।
