ਈਰਾਨ ਬਹੁਤ ਜ਼ਿਆਦਾ ਪਰਮਾਣੂ ਹਥਿਆਰ ਦਾ ਨਿਰਮਾਣ ਕਰਦਾ ਰਹਿੰਦਾ ਹੈ। ਹੁਣ ਈਰਾਨ ਆਪਣੇ ਪ੍ਰਮਾਣੂ ਕੇਂਦਰ ਨੂੰ ਇਜ਼ਰਾਈਲ ਅਤੇ ਅਮਰੀਕਾ ਦੇ ਹਮਲੇ ਤੋਂ ਬਚਾਉਣ ਦੀ ਪੂਰੀ ਕੋਸ਼ਿਸ਼ ਕਰ ਰਿਹਾ ਹੈ। ਅਜਿਹੇ 'ਚ ਹੁਣ ਉਸ ਨੇ ਪਹਾੜੀ ਖੇਤਰ 'ਚ ਜ਼ਮੀਨਦੋਜ਼ ਪਰਮਾਣੂ ਹਥਿਆਰ ਬਣਾਉਣ ਦਾ ਕੰਮ ਸ਼ੁਰੂ ਕਰ ਦਿੱਤਾ ਹੈ। ਸੈਟੇਲਾਈਟ ਫੋਟੋਆਂ 'ਚ ਇਸ ਗੱਲ ਦਾ ਖੁਲਾਸਾ ਹੋਇਆ ਹੈ।
ਏਪੀ ਦੀ ਰਿਪੋਰਟ ਦੇ ਅਨੁਸਾਰ, ਫੋਟੋ ਵਿੱਚ ਈਰਾਨੀ ਕਾਮੇ ਜ਼ਾਗਰੋਸ ਦੇ ਪਹਾੜਾਂ ਵਿੱਚ ਸੁਰੰਗ ਖੋਦਦੇ ਹੋਏ ਦਿਖਾਈ ਦੇ ਰਹੇ ਹਨ। ਇਹ ਸਥਾਨ ਈਰਾਨ ਦੀ ਪਰਮਾਣੂ ਸਾਈਟ ਨਟਾਨਜ਼ ਦੇ ਬਹੁਤ ਨੇੜੇ ਹੈ, ਜਿਸ 'ਤੇ ਪੱਛਮੀ ਦੇਸ਼ਾਂ ਦੇ ਲਗਾਤਾਰ ਹਮਲੇ ਹੁੰਦੇ ਆ ਰਹੇ ਹਨ। ਇਹ ਦੇਸ਼ ਨਹੀਂ ਚਾਹੁੰਦੇ ਕਿ ਈਰਾਨ ਪ੍ਰਮਾਣੂ ਸ਼ਕਤੀ ਹਾਸਲ ਕਰੇ। ਐਂਟੀ-ਏਅਰਕ੍ਰਾਫਟ ਬੈਟਰੀਆਂ, ਕੰਡਿਆਲੀ ਤਾਰ ਅਤੇ ਈਰਾਨ ਦੇ ਅਰਧ ਸੈਨਿਕ ਬਲ ਦੇ ਰੈਵੋਲਿਊਸ਼ਨਰੀ ਗਾਰਡ ਪ੍ਰਮਾਣੂ ਸਹੂਲਤ ਦੀ ਰੱਖਿਆ ਲਈ ਨਵੇਂ ਪ੍ਰੋਜੈਕਟ ਦੀ ਸੁਰੱਖਿਆ ਕਰ ਰਹੇ ਹਨ। ਇਹ ਸੁਰੰਗਾਂ 6 ਮੀਟਰ ਚੌੜੀਆਂ ਅਤੇ 8 ਮੀਟਰ ਲੰਬੀਆਂ ਹਨ।
ਏਪੀ ਦੇ ਅਨੁਸਾਰ, ਈਰਾਨ 80 ਤੋਂ 100 ਮੀਟਰ ਦੀ ਡੂੰਘਾਈ 'ਤੇ ਆਪਣੀ ਸਹੂਲਤ ਬਣਾ ਰਿਹਾ ਹੈ। ਅਮਰੀਕਾ ਨੇ ਭੂਮੀਗਤ ਸੁਵਿਧਾ 'ਤੇ ਹਮਲਾ ਕਰਨ ਲਈ GBU-57 ਬੰਬ ਬਣਾਇਆ ਹੈ। ਜੋ ਬਿਨਾਂ ਫਟਣ ਦੇ ਜ਼ਮੀਨ ਵਿੱਚ 60 ਮੀਟਰ ਅੰਦਰ ਜਾ ਸਕਦਾ ਹੈ। ਇਹ 80 ਤੋਂ 100 ਮੀਟਰ ਦੀ ਡੂੰਘਾਈ 'ਤੇ ਬਣੇ ਈਰਾਨ ਦੇ ਪ੍ਰਮਾਣੂ ਕੇਂਦਰ ਨੂੰ ਪ੍ਰਭਾਵਿਤ ਨਹੀਂ ਕਰੇਗਾ। ਈਰਾਨ ਦਾ ਯੂਰੇਨੀਅਮ ਉਤਪਾਦਨ ਪ੍ਰਮਾਣੂ ਹਥਿਆਰ ਬਣਾਉਣ ਦੇ ਪੱਧਰ ਤੱਕ ਪਹੁੰਚ ਰਿਹਾ ਹੈ। ਇਸ 'ਤੇ ਅਮਰੀਕਨ ਆਰਮਜ਼ ਕੰਟਰੋਲ ਐਸੋਸੀਏਸ਼ਨ ਦੇ ਅਧਿਕਾਰੀ ਨੇ ਕਿਹਾ ਕਿ ਈਰਾਨ ਦੀ ਪਰਮਾਣੂ ਸੁਵਿਧਾ ਦਾ ਪੂਰਾ ਹੋਣਾ ਇਕ ਸੁਪਨੇ ਵਰਗਾ ਹੋਵੇਗਾ।
ਈਰਾਨ ਦੇ ਪਰਮਾਣੂ ਹਥਿਆਰ ਹਾਸਲ ਕਰਨ ਦੇ ਸੁਪਨੇ ਨੂੰ ਪੂਰਾ ਹੋਣ ਤੋਂ ਰੋਕਣ ਲਈ ਅਮਰੀਕਾ ਉਸ 'ਤੇ ਲਗਾਤਾਰ ਪਾਬੰਦੀਆਂ ਲਗਾ ਰਿਹਾ ਹੈ। ਹਾਲ ਹੀ ਵਿੱਚ, ਬਿਡੇਨ ਨੇ ਈਰਾਨ ਦੇ ਤੇਲ ਅਤੇ ਪੈਟਰੋਕੈਮੀਕਲ ਉਦਯੋਗ 'ਤੇ ਪਾਬੰਦੀਆਂ ਨੂੰ ਹੋਰ ਸਖਤ ਕਰਨ ਦਾ ਐਲਾਨ ਕੀਤਾ ਹੈ। 5 ਸਾਲ ਪਹਿਲਾਂ ਇਸੇ ਮਹੀਨੇ ਅਮਰੀਕਾ ਦੇ ਤਤਕਾਲੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਈਰਾਨ ਨਾਲ ਹੋਏ ਪ੍ਰਮਾਣੂ ਸਮਝੌਤੇ ਤੋਂ ਖੁਦ ਨੂੰ ਬਾਹਰ ਕੱਢ ਲਿਆ ਸੀ। ਇਹ ਡੀਲ ਓਬਾਮਾ ਦੇ ਕਾਰਜਕਾਲ ਦੌਰਾਨ ਹੋਈ ਸੀ। ਉਸ ਸਮੇਂ ਦੌਰਾਨ ਜੋ ਬਿਡੇਨ ਅਮਰੀਕਾ ਦੇ ਉਪ ਰਾਸ਼ਟਰਪਤੀ ਸਨ।
