ਯੂਏਈ ਨੂੰ ਵਿਸ਼ਵ ਦੇ ਸਭ ਤੋਂ ਆਮਿਰ ਦੇਸ਼ਾਂ ਵਿੱਚੋ ਇਕ ਮੰਨਿਆ ਜਾਂਦਾ ਹੈ। ਸੰਯੁਕਤ ਅਰਬ ਅਮੀਰਾਤ (UAE) ਨਵੇਂ ਸਾਲ 'ਤੇ ਆਪਣੇ ਕਰਮਚਾਰੀਆਂ ਨੂੰ ਆਰਾਮ ਦਾ ਤੋਹਫਾ ਦੇਣ ਜਾ ਰਿਹਾ ਹੈ। 1 ਜਨਵਰੀ 2022 ਤੋਂ ਇੱਥੇ ਹਫ਼ਤੇ ਵਿੱਚ ਸਿਰਫ਼ ਸਾਢੇ ਚਾਰ ਦਿਨ ਹੀ ਕੰਮ ਹੋਵੇਗਾ। ਬਾਕੀ ਢਾਈ ਦਿਨ ਛੁੱਟੀ ਰਹੇਗੀ। ਯੂਏਈ ਸਰਕਾਰ ਨੇ ਇਸ ਸਬੰਧ ਵਿੱਚ ਅਧਿਕਾਰਤ ਬਿਆਨ ਜਾਰੀ ਕੀਤਾ ਹੈ।
ਕੁਝ ਦਿਨਾਂ ਵਿੱਚ ਸਾਰੇ ਸਰਕਾਰੀ ਦਫ਼ਤਰਾਂ ਨੂੰ ਸਰਕੂਲਰ ਭੇਜ ਦਿੱਤਾ ਜਾਵੇਗਾ। ਯੂਏਈ ਹਫਤਾਵਾਰੀ ਕੰਮ ਦੇ ਘੰਟੇ ਘਟਾਉਣ ਵਾਲਾ ਦੁਨੀਆ ਦਾ ਪਹਿਲਾ ਦੇਸ਼ ਹੈ। ਦੁਨੀਆ ਦੇ ਬਹੁਤੇ ਦੇਸ਼ਾਂ ਵਿੱਚ ਪੰਜ ਦਿਨ ਕੰਮ ਕਰਨ ਵਾਲੇ ਹਫ਼ਤੇ ਦਾ ਸੱਭਿਆਚਾਰ ਹੈ।ਯੂਏਈ ਦੇ ਅਖਬਾਰ 'ਦਿ ਨੈਸ਼ਨਲ' ਮੁਤਾਬਕ 1 ਜਨਵਰੀ 2022 ਤੋਂ ਨਵੇਂ ਕਾਰਜਕਾਰੀ ਕੈਲੰਡਰ ਨੂੰ ਲਾਗੂ ਕਰਨ ਦੀ ਯੋਜਨਾ ਇਸ ਲਈ ਬਣਾਈ ਗਈ ਸੀ, ਤਾਂ ਕਿ ਇਸ ਨੂੰ ਲਾਗੂ ਕਰਨ 'ਚ ਕੋਈ ਦਿੱਕਤ ਨਾ ਆਵੇ।
ਯੂਏਈ 'ਚ ਕਰਮਚਾਰੀਆਂ ਲਈ ਜਿਸ ਤਰ੍ਹਾਂ ਦੇ ਨਿਯਮ ਹਨ, ਉਸ ਦੇ ਆਧਾਰ 'ਤੇ ਮੰਨਿਆ ਜਾ ਰਿਹਾ ਹੈ ਕਿ ਜਲਦ ਹੀ ਦੇਸ਼ ਦਾ ਪ੍ਰਾਈਵੇਟ ਸੈਕਟਰ ਵੀ ਅਜਿਹਾ ਕਦਮ ਚੁੱਕੇਗਾ।ਸ਼ੁੱਕਰਵਾਰ ਨੂੰ ਅੱਧੇ ਦਿਨ ਯਾਨੀ ਅੱਧੇ ਦਿਨ ਦਾ ਕੰਮ ਹੋਵੇਗਾ। ਸ਼ਨੀਵਾਰ ਅਤੇ ਐਤਵਾਰ ਨੂੰ ਪੂਰੀ ਛੁੱਟੀ ਰਹੇਗੀ। ਹੁਕਮਾਂ ਮੁਤਾਬਕ ਜੇਕਰ ਕਰਮਚਾਰੀ ਸ਼ੁੱਕਰਵਾਰ ਨੂੰ ਘਰੋਂ ਕੰਮ ਕਰਨਾ ਚਾਹੁੰਦੇ ਹਨ ਤਾਂ ਉਨ੍ਹਾਂ ਨੂੰ ਇਸ ਦੀ ਮਨਜ਼ੂਰੀ ਲੈਣੀ ਪਵੇਗੀ। ਸਰਕਾਰ ਦੇ ਇਸ ਐਲਾਨ ਤੋਂ ਦੁਬਈ ਅਤੇ ਆਬੂ ਧਾਬੀ ਦੇ ਕਰਮਚਾਰੀ ਕਾਫੀ ਖੁਸ਼ ਹਨ।
ਖਬਰਾਂ ਮੁਤਾਬਕ ਜਲਦ ਹੀ ਦੇਸ਼ ਦੇ ਸਾਰੇ ਸਕੂਲ ਅਤੇ ਕਾਲਜ ਵੀ ਇਸ ਨਵੇਂ ਨਿਯਮ ਦੀ ਪਾਲਣਾ ਕਰਨਗੇ। ਇਸ ਸਬੰਧੀ ਵੱਖਰਾ ਸਰਕੂਲਰ ਜਾਰੀ ਕੀਤਾ ਜਾ ਸਕਦਾ ਹੈ। ਹਾਲਾਂਕਿ, ਸਕੂਲਾਂ ਅਤੇ ਪ੍ਰਾਈਵੇਟ ਸੈਕਟਰ ਨੂੰ ਲੈ ਕੇ ਅਜੇ ਤੱਕ ਕੋਈ ਦਿਸ਼ਾ-ਨਿਰਦੇਸ਼ ਜਾਰੀ ਨਹੀਂ ਕੀਤੇ ਗਏ ਹਨ। ਕੰਪਨੀਆਂ ਆਪਣੇ ਤੌਰ 'ਤੇ ਫੈਸਲਾ ਲੈਣਗੀਆਂ।ਯੂਏਈ ਸਰਕਾਰ ਦੇ ਅਧਿਕਾਰਤ ਮੀਡੀਆ ਸੈੱਲ ਨੇ ਕਿਹਾ - ਜੇਕਰ ਅਸੀਂ ਕੰਮ ਦੇ ਬਦਲੇ ਆਪਣੇ ਕਰਮਚਾਰੀਆਂ ਨੂੰ ਬਰਾਬਰ ਆਰਾਮ ਦਿੰਦੇ ਹਾਂ, ਤਾਂ ਇਸ ਨਾਲ ਉਨ੍ਹਾਂ ਦੀ ਉਤਪਾਦਕਤਾ ਵਧੇਗੀ। ਇਸ ਦਾ ਫਾਇਦਾ ਦੇਸ਼ ਨੂੰ ਹੀ ਹੋਵੇਗਾ।
ਯੂਏਈ ਨੇ ਆਖਰੀ ਵਾਰ 2006 ਵਿੱਚ ਕੰਮਕਾਜੀ ਹਫ਼ਤੇ ਦੇ ਪੈਟਰਨ ਨੂੰ ਬਦਲਿਆ ਸੀ। ਫਿਰ ਵੀਰਵਾਰ-ਸ਼ੁੱਕਰਵਾਰ ਦੀ ਬਜਾਏ ਸ਼ੁੱਕਰਵਾਰ-ਸ਼ਨੀਵਾਰ ਨੂੰ ਛੁੱਟੀ ਐਲਾਨੀ ਗਈ ਸੀ ।ਸਰਕਾਰ ਦਾ ਕਹਿਣਾ ਹੈ ਕਿ ਉਹ ਗਲੋਬਲ ਬਾਜ਼ਾਰਾਂ ਦੀ ਤਰਜ਼ 'ਤੇ ਚੱਲਣਾ ਚਾਹੁੰਦੀ ਹੈ। 1971 ਤੋਂ 1999 ਤੱਕ ਦੇਸ਼ ਵਿੱਚ 6 ਦਿਨ ਕੰਮ ਕਰਦੇ ਸਨ। 1999 ਵਿੱਚ ਇਸ ਨੂੰ ਪੰਜ ਦਿਨ ਅਤੇ ਹੁਣ ਸਾਢੇ ਚਾਰ ਦਿਨ ਕਰ ਦਿੱਤਾ ਗਿਆ ਹੈ।
