ਏਅਰਲਾਈਨ 'ਚ ਭਰਤੀ ਨੂੰ ਲੈ ਕੇ ਇਕ ਅਜੀਬ ਕਿੱਸਾ ਸੁਨਣ ਨੂੰ ਮਿਲ ਰਿਹਾ ਹੈ। ਕੁਵੈਤੀ ਏਅਰਲਾਈਨ 'ਚ ਭਰਤੀ ਪ੍ਰਕਿਰਿਆ ਨੂੰ ਲੈ ਕੇ ਕੁਝ ਹੈਰਾਨ ਕਰਨ ਵਾਲੇ ਦਾਅਵੇ ਕੀਤੇ ਗਏ ਹਨ। ਏਅਰ ਹੋਸਟੇਸ ਦੀ ਨੌਕਰੀ ਲਈ ਅਪਲਾਈ ਕਰਨ ਵਾਲੀਆਂ ਔਰਤਾਂ ਨੂੰ ਕਥਿਤ ਤੌਰ 'ਤੇ ਆਪਣੇ ਕੱਪੜੇ ਉਤਾਰਨ ਲਈ ਮਜ਼ਬੂਰ ਕੀਤਾ ਗਿਆ ਅਤੇ ਏਅਰਲਾਈਨ ਇੰਟਰਵਿਊ ਦੌਰਾਨ 'ਕੁੱਤਿਆਂ' ਵਾਂਗ ਵਿਵਹਾਰ ਕੀਤਾ ਗਿਆ।
ਕੁਵੈਤ ਏਅਰਵੇਜ਼ ਲਈ ਮੈਡ੍ਰਿਡ ਦੇ ਹਵਾਈ ਅੱਡੇ ਨੇੜੇ ਮੇਲੀਆ ਬਰਜਾਸ ਹੋਟਲ ਵਿੱਚ ਇੰਟਰਵਿਊ ਦੌਰਾਨ ਮਹਿਲਾ ਬਿਨੈਕਾਰਾਂ ਨੂੰ 'ਬ੍ਰਾ ਅਤੇ ਅੰਡਰਵੀਅਰ' ਵਿੱਚ ਆਉਣ ਲਈ ਕਿਹਾ ਗਿਆ ਸੀ। ਸਪੈਨਿਸ਼ ਮੀਡੀਆ ਮੁਤਾਬਕ ਏਅਰਲਾਈਨ ਭਰਤੀ ਏਜੰਸੀ ਮੇਕਟੀ ਦੇ ਕੁਝ ਲੋਕਾਂ ਨੇ ਉਨ੍ਹਾਂ ਦੇ ਦੰਦ ਵੀ 'ਕੁੱਤਿਆਂ ਵਾਂਗ' ਚੈੱਕ ਕੀਤੇ।
ਡੇਲੀਸਟਾਰ ਦੀ ਰਿਪੋਰਟ ਮੁਤਾਬਕ 23 ਸਾਲਾ ਔਰਤ ਬਿਨੈਕਾਰ ਮਾਰੀਆਨਾ ਨੇ ਦਾਅਵਾ ਕੀਤਾ ਹੈ ਕਿ ਇੰਟਰਵਿਊ ਦੌਰਾਨ ਇਕ ਔਰਤ ਨੋਟਪੈਡ 'ਤੇ ਨੋਟ ਲੈ ਰਹੀ ਸੀ। ਉਸਨੇ ਉਨ੍ਹਾਂ ਦੇ ਅੰਡਰਵੀਅਰ ਦਾ ਨਿਰੀਖਣ ਕੀਤਾ। ਜਾਂਚ ਤੋਂ ਬਾਅਦ, ਜਿਨ੍ਹਾਂ ਲੋਕਾਂ ਦਾ ਭਾਰ ਜ਼ਿਆਦਾ ਸੀ, ਐਨਕਾਂ ਪਹਿਨੀਆਂ ਸਨ ਜਾਂ ਦਿਖਾਈ ਦੇਣ ਵਾਲੇ ਦਾਗ ਸਨ, ਉਨ੍ਹਾਂ ਨੂੰ ਤੁਰੰਤ ਰੱਦ ਕਰ ਦਿੱਤਾ ਗਿਆ ਸੀ। ਇਕ ਔਰਤ ਨੇ ਕਿਹਾ ਕਿ ਜਿਨ੍ਹਾਂ ਦੇ ਸਰੀਰ 'ਤੇ ਕੋਈ ਨਿਸ਼ਾਨ ਹੋਵੇ ਉਨ੍ਹਾਂ ਨੂੰ ਦਾਖਲ ਨਹੀਂ ਕੀਤਾ ਜਾਵੇਗਾ।
ਮਾਰੀਆਨਾ ਨੇ ਕਿਹਾ ਕਿ ਇੱਕ ਲੜਕੀ ਜੋ ਸੱਤ ਭਾਸ਼ਾਵਾਂ ਬੋਲ ਸਕਦੀ ਸੀ, ਨੂੰ ਰੱਦ ਕਰ ਦਿੱਤਾ ਗਿਆ ਕਿਉਂਕਿ ਉਸ ਦੇ ਮੱਥੇ ਉੱਤੇ ਇੱਕ ਛੋਟਾ ਜਿਹਾ ਦਾਗ ਸੀ। ਉਸ ਨੂੰ ਦੱਸਿਆ ਗਿਆ ਕਿ ਇਸ ਨਾਲ ਕੋਈ ਫਰਕ ਨਹੀਂ ਪੈਂਦਾ ਕਿ ਉਹ ਸੱਤ ਭਾਸ਼ਾਵਾਂ ਜਾਣਦੀ ਹੈ। ਇੰਟਰਵਿਊ ਵਿੱਚ ਸ਼ਾਮਲ ਹੋਈ ਬਿਆਂਕਾ (23) ਨੇ ਸਥਾਨਕ ਮੀਡੀਆ ਨੂੰ ਦੱਸਿਆ ਕਿ ਉਸ ਤੋਂ ਪਹਿਲਾਂ ਦੀ ਔਰਤ ਇੰਟਰਵਿਊ ਤੋਂ ਬਾਅਦ ਰੋਂਦੀ ਹੋਈ ਬਾਹਰ ਆਈ। ਜਦੋਂ ਉਸਦੀ ਵਾਰੀ ਆਈ ਤਾਂ ਉਸਨੂੰ ਆਪਣਾ ਪਹਿਰਾਵਾ ਚੁੱਕਣ ਲਈ ਕਿਹਾ ਗਿਆ। ਪਰ ਇੰਟਰਵਿਊ ਲੈਣ ਵਾਲੇ 'ਹੋਰ' ਦੇਖਣਾ ਚਾਹੁੰਦੇ ਸਨ। ਆਖਿਰਕਾਰ ਔਰਤ ਨੂੰ ਬ੍ਰਾ ਅਤੇ ਅੰਡਰਵੀਅਰ ਵਿੱਚ ਆਉਣਾ ਪਿਆ।
ਉਸ ਨੇ ਕਿਹਾ, 'ਇਕ ਔਰਤ ਨੇ ਮੈਨੂੰ ਆਪਣਾ ਮੂੰਹ ਖੋਲ੍ਹਣ ਲਈ ਕਿਹਾ ਅਤੇ ਅੰਦਰ ਝਾਕਣ ਲੱਗੀ ਜਿਵੇਂ ਮੈਂ 'ਕੁੱਤਾ' ਹਾਂ। ਉਸਨੇ ਮੇਰੇ ਦੰਦਾਂ ਨੂੰ ਵੇਖਣ ਲਈ ਲਗਭਗ ਆਪਣੀਆਂ ਅੱਖਾਂ ਮੇਰੇ ਮੂੰਹ ਦੇ ਅੰਦਰ ਪਾ ਦਿੱਤੀਆਂ। ਮੈਂ ਬਹੁਤ ਅਪਮਾਨਿਤ ਮਹਿਸੂਸ ਕੀਤਾ। ਉਸ ਨੇ ਦੱਸਿਆ ਕਿ ਇਸ ਦੌਰਾਨ ਉਸਨੂੰ 'ਚਿੜੀਆਘਰ ਵਿਚ ਜਾਨਵਰ' ਵਰਗਾ ਮਹਿਸੂਸ ਕਰਵਾਇਆ ਗਿਆ। ਇੱਕ ਤੀਜੀ ਔਰਤ, 19 ਸਾਲਾ ਮਾਰੀਆ, ਨੇ ਦੱਸਿਆ ਕਿ ਕੁਝ ਬਿਨੈਕਾਰਾਂ ਨੂੰ ਘੱਟ ਖਾਣ ਅਤੇ ਭਾਰ ਘਟਾਉਣ ਲਈ ਕਿਹਾ ਗਿਆ ਸੀ, ਜਦੋਂ ਕਿ ਦੂਜਿਆਂ ਨੂੰ ਭਾਰ ਵਧਾਉਣ ਲਈ ਕਿਹਾ ਗਿਆ ਸੀ। ਕੁਵੈਤ ਏਅਰਵੇਜ਼ ਜਾਂ ਮੇਕਟੀ ਨੇ ਅਜੇ ਤੱਕ ਸਪੈਨਿਸ਼ ਮੀਡੀਆ ਵਿੱਚ ਪ੍ਰਕਾਸ਼ਿਤ ਦੋਸ਼ਾਂ 'ਤੇ ਕੋਈ ਟਿੱਪਣੀ ਨਹੀਂ ਕੀਤੀ ਹੈ।
